ከፍቅረኛህ የፍቅር ቦነሶችን ትፈልጋለህ? እንግዲያውስ ይሄንን አንብብ

የምታፈቅራትን ሴት ለማግኘት ያልወጣኸው ዳገት ያልከፈልከው መስዋዕትነት የለም ይሆናል፡፡ የወንዶች ትልቁ ችግር ታዲያ የሚያፈቅሯት ሴት አጠገባቸው ሆና አብረው ጥሩ ሆነው ጊዜያቸውን እያሳለፉም ስለቀጣዩ የፍቅራቸው ቀጣይነት ብዙ አለማሰባቸው ነው፡፡ በዛችው ቅፅበት ብቻ በሚያሳልፉት ህይወት እርካታቸውን ጣሪያ ላይ በማድረስ ነገስ ስለሚለው የሚያስቡት ነገር በጣም ዝቅተኛ ነው፡፡ ይህ ደግሞ የሚያፈቅሯትን ሴት ከእጃቸው እንድትወጣ የማድረግ አጋጣሚው ሰፊ የመሆን እድል ይኖረዋል፡፡ ‹‹ሴቶች ምን ይፈልጋሉ›› የሚለው ጥያቄን ሁል ጊዜ ለራስህ እየጠየክና መልስ እየሰህበት ስትመጣ ቀጣይነት ያለው ፍቅርን እያደስክ መምጣት ትችላለህ፡፡ ነገሩ ግን እዚህ ላይ አያበቃም፡፡ ያወቅነውንና መደረግ ያለበትን ጊዜውንና ሁኔታዎችን አመቻችተን መተግበር መቻል አስፈላጊ ነው፡፡ ከእሷ የምናገኘው መረጃ ለፍቅራችን ቀጣይነት እስከጠቀመ ድረስ በተግባር መገለፁ የግድ ይሆናል፡፡ ስለሆነም ሴቶች ምን ይፈልጋሉ የሚለውን ማወቅ ከዛም መልስ መስጠትና በተግባር መግለፅ የምታፈቅራትን ሴት በእጅህ እንድታስገባት ብቻ ሳይሆን እንድታቆያትም ወሳኝ ይሆናል ማለት ነው፡፡ ምናልባት በየጊዜው ስለሴቶች ፍላጎት ለማወቅ በጣርክ ቁጥር የማያልቁ ብዙ ፍላጎቶቻቸውን እንደዛውም ብዙ መልሶችንም ልታገኝ ትችላለህ፡፡ አንተ ግን ወሳኝ የምትላቸውን ነገሮች በየዕለቱ ምረጣቸው በተግባርም አውላቸው፡፡ እንደ ጋራ ስሜት በሴቶች ላይ ሊንፀባረቁ የሚችሉ ወሳኝ ፍላጎቶቻቸው ቀጥለው ያሉት ናቸውና እወቃቸው ከዛም ተግብራቸው፡፡ በእነዚህም ሴት ልጅን ካፈቀርካት በኋላ ያንተ ሆና እንድትቆይ ምን ማድረግ እንዳለብህ የሚጠቁምህ ይሆናል፡፡

1. እወቃት
ይህ የመመሪያው ትልቁ የቤት ስራህ ነው፡፡ ቀላል ጉደይ ግን አይደለም፡፡ በተለይም በሀገራችን ባለው ባህል ይህ ከባድ ነው፡፡ ምክንያቱም ሴቶችን እያወቅናቸው አላደግንምና፡፡ ሴቶች ግን በተቃራኒው ወንዶችን የማወቅ እድላቸው ከፍተኛ ነው፡፡ ወንዱ ለምን ተከፋ፣ በህይወቱ መስራት የሚፈልገው ምንድን ነው፣ ስለሚበላውና ስለሚጠጣው ሁሉ ሳይቀር ሴቶች በቀላሉ የማወቅ እድል አላቸው፡፡ ይህም ሴቶች ስለወንዱ የማወቅ ጉጉታቸው ከፍተኛ ስለሆነ ነው፡፡ ይህን የማወቅ ጉጉት አንተም ውስጥ እንዲፈጠር አድርገውና ተግብረው፡፡ በአጠቃላይ የምታፈቅራትን ሴት በትክክል ማወቅህ እርካታዋን ለመጨመር ያግዝሃል፡፡ በቀላሉ ለመግለፅ እርሷን በደንብ ማወቅና የውስጧንም መረዳት በጣም ቀላል የሆኑ ነገሮችን ሁሉ ማወቅና የውስጧን መረዳት ነው፡፡

2. አፍቃሪ ሁን
ሴቶች ጥሩ ወሲብ ፈፃሚን ብቻ አይደለም የሚፈልጉት፡፡ ጥሩ አፍቃሪ ወንድንም ጭምር እንጂ፡፡ ሴቶች ቅርርብን የሚፈጥር፣ ፍቅርን ሰጥቶ የሚቀበል፣ መንከባከብ የሚችል፣ ነቃ ያለ (እርጋታን ጨምሮ) የሚግባባና ተጫዋች የሆነ እንደዚሁም በግልፅ ስሜቱን የሚገልፅ ወንድን ይወዳሉ፡፡ ይህን እየወደዱልህ ግን አንድ ደረጃ ቀድመህ ሄደህ ፍላጎታቸውን እንድታውቅላቸው ይፈልጋሉ፡፡ ነገሮችህን መውደዳቸውም ለእነሱ ቀላል የሆንክና መፍትሄ የምትሰጣቸው እንደሆነ ስለሚያስቡ ነው፡፡ ታዲያ አፍቃሪ ሁን ስትባል ሁል ጊዜ አበባና ቸኮሌት ይዞ መምጣት (የፍቅር መግለጫ መሆናቸው እንዳለ ሆኖ) ብቻ ወይንም ስለ እሷ እያሰብክ ብቻ ግጥም ጽፈህ አንብብላት ማለት ብቻ አይደለም፡፡ ማድረግ ከቻልክ ሳይደጋግሙ እንደ ሁኔታው እነዚህን ማድረጉም መጥፎ ነው ማለት አይደለም፡፡ ነገር ግን አሁን እያወራን ያለነው ቀላልና ወሳኝ ስለሆኑና በቀን በቀን አፍቃሪነትህን የበለጠ ስለምታሳይባቸው ነገሮች ነው፡፡ ዋናው አፍቃሪነትህን የሚያሳይልህ የእርሷን ህይወት መጋራት እና እሷን መቅረብህ ነው፡፡ በችግሮቿም ሆነ በደስታዋ ከጎኗ ሁን ልክ እንደ ጓደኛ፡፡ ይህ የበለጠ መቀራረብን ያመጣል፡፡ መቀራረብ ደግሞ አንተን የመፈለግ ዝንባሌዋን ይጨምረዋል፡፡ ታዲያ አንተ ሁልጊዜ ለእሷ ጥሩ ሰው ብቻ ሳትሆን ጥሩ አፍቃሪም መሆንህን በተለያዩ መንገዶች ማሳየት አለብህ፡፡

3. ማድረግ ያለብህን አድርግ
አብራችሁ የመሆን እድልን ባገኘህ ጊዜ የእሷ ኃላፊነት የሆኑ ስራዎችን ተጋራት፣ በመተጋገዝ ለመስራት ሞክሩ፡፡ በነገሮቿ ውስጥ እያገዝካት ስትመጣ የበለጠ የተፈለገችና የተወደደች እንደሆነች ይሰማታል፡፡ በዚህም ለቀጣይ ፍቅራችሁ ራሷን ዝግጁ እደረገች እንድትመጣ ታደርጋታለህ፡፡
ሁል ጊዜም ራስህን ንፁህ አድርገህ ቅረብ፡፡ መስብዕነትን ፍጠርባት፡፡ ሁኔታዎችህ ሁሉ ጥንቃቄህን፣ ማራኪነትህን፣ አማላይነትህንና ተንከባካቢነትህን የሚያሳዩ አድርጋቸው፡፡ እነዚህ ነገሮች ለሴቶች ቅርብ እንደመሆናቸው መጠን እርካታቸውን ይጨምራል፡፡ ከእሷ ነገሮች በመነሳት ነገሮችን እየፈፀምክ በመጣህ ቁጥር ደግሞ ለእሷም ፍላጎት ምላሽ እየሰጠህ እንደሆነ ይሰማታል፡፡ እነዚህንና የመሳሰሉትን ማድረግ እንዳለብህ ካመንክ አድርጋቸው፡፡ ይህንን ስታደርግ ግን እርሷ አድርግልኝ ብለህ ሳይሆን በራስህ ተነሳሽነት መሆን አለበት፡፡ እርሷ ሳትጠይቅህ ካደረክላት ላደረከው ስራ ተጨማሪ የፍቅር ቦነስ የማግኘት እድልህ ይጨምራል፡፡ ይህ ደግሞ ያደረከው ነገር ለእሷ ስትል መሆኑን፣ ምን ያህል እንደምትወዳት እና እንደምትንከባከባት እንድታውቅ ማድረግም ጭምር ነው፡፡ እያንዳንዱን ነገር ስታደርግ ግን በውስጥህ ስሜታዊ የሆነ የወሲብ ስሜት ሊኖርህ አይገባም፡፡ ብዙዎቻችን ሴቶችን ስንቀርብ በችኮላ ነገሮችን ወደ ሌላ አቅጣጫ የሚወስድብን ቅራኔ ውስጥ የሚከተን በውስጣችን ቅጽበታዊ የወሲብ ስሜት ስሚኖር ነው፡፡ ይህ ከሆነ ያፈቀርካት ሴት አንተ ወሲብ ፈላጊ እንጂ እውነተኛ አፍቃሪ መሆንህን አታውቀውም፡፡ ስለዚህም እነዚህ ነገሮችህ ላይ ጥንቃቄ ልታደርግ ይገባሃል፡፡ ሁል ጊዜ ማድረግ ያለብህ ነገሮች ሁሉ የፍቅር ሰው መሆንህን የሚያሳዩ ይሁኑ፡፡

4. እርካታና ትኩረት
ሴቶች እርካታን ከማንም በላይ ይፈልጋሉ፡፡ በሁለታችሁ መካከል ጥሩ መቀራረብ የፈጠረው ግንኙነት እየጠነከረና እየረዘመ በመጣ ቁጥር አንዳችሁ ለአንዳችሁ የምትከፍሉት መስዋእትነትም አብሮ ያድጋል፡፡ ያ ማለት ደግሞ በመስዋእትነት የተፈተነና ወደ ጥልቅ ፍቅር የሚያመራ መቀራረብ ይሆናል፡፡ ይህ በመስዋዕትነት የተፈተነ መቀራረብና ፍቅር ደግሞ በእርካታ የተሞላ ይሆናል፡፡ ሴቶችን በሚፈልጉት ነገር ለማርካት ደግሞ እነሱን ማወቅ የመጀመሪያው ስራ ይሆናል፡፡ በመቀጠልም ፍላጎቷን አውቀህ እርካታዋ ሊያሟሉ የሚችሉ ነገሮችን በማድረግ ለማስደሰት ቅርርባችሁን የበለጠ ማጠናከር ነው፡፡ ከላይም የጠቀስናቸው ነገሮች በሙሉ ከእሷ እርካታ ጋር የተያያዙ ናቸውና የእሷን እርካታ የራስህ እርካታ እንደሆነ ቁጠረውና እሷን ለማርካት ሁል ጊዜ መጣር ይገባሃል፡፡
ታዲያ ከእርካታ ጋር በተያያዘ መነሻ የሚሆንህ ለሴቷ የምትሰጠው ትኩረት ነው፡፡ ከአንዲት ሴት ጋር ገና እንደተዋወቃችሁ ሁለታችሁም ብዙ ታወሩ ይሆናል፡፡ አንተ ተናጋሪ ሆነህ እሷ አድማጭ ልትሆን ትችላለች፡፡ ወደ ፍቅር ውስጥ ለገባ ቅርርብ ግን ይህ የተሳሳተ ሂደት ውስጥ ይከተዋል፡፡ ምክንያቱም በተለይም ፍቅር ውስጥ ከገባህ በኋላ አንተ ብዙውን ጊዜ አድማጭ ሆነህ እሷ ስትናገር መስማት አለብህ፡፡ ምን ያህል ትኩረት እንደሰጠሃትም የምትረዳበት መንገድ ነው፡፡ ምክንያቱም ሴቶች አንተ ውስጥ ትልቁን እርካታ የሚያገኙት ጆሮን ስትሰጣቸው ነው፡፡ ሴት ልጅ እንድታዳምጣት በጣም ትፈልጋለች፡፡ የውሸት መስማት ብቻ ሳይሆን ከልባችን የሆነ ማዳመጥን ይፈልጋሉ፡፡ እሷ የምታወራው ምንም ይሁን ምንም ማዳመጥ ተገቢ ነው፡፡ ምናልባትም የምታወራው ቀላልና ብዙ የማይስብ ወይንም ለግንኙነታችሁ የማይጠቅም ሊሆን ይችላል፡፡ ነገር ግን የምናፈቅራትን ለማግኘት ማዳመጥ ተገቢ ነው፡፡ የአንተ ስራ ታዲያ እርሷ ስታወራ አይን አይኗን መመልከትና ሙሉ ትኩረትህን ወደ እሷ ማድረግ ነው፡፡ ሴቶች ደግሞ በተፈጥሯቸው የውስጥ ስሜታቸውን የሚያዳምጣቸው ወንድ በጣም ይመቻቸዋል፡፡ ይህም ባላችሁ ግንኙነት ውስጥ ከሁሉም ነገር በላይ (አንተ ማውራት ከምትፈልገው ነገርም በላይ) ትኩረት የሚሰጣቸው ወንድ ምን ያህል ጊዜውንም መስዋዕት እንዳደረገላቸውና ፍላጎቶቻቸውንም እንዳስቀደምክላቸው ስለሚያስቡ ምስጋና ብቻ ሳይሆን ሊሰጡት የሚፈልጉት ብዙ ነገር ይኖራቸዋል፡፡ ከዚህም ውስጥ ፍቅራቸውን መለገስ ዋናው ይሆናል፡፡ በፍቅር ውስጥ ላሉት ደግሞ የበለጠ ፍቅርን እንድትሰጠው ያደርጋታል፡፡ ለራሱ የፍቅር ቦነስ ፈጠረ ማለት ነው፡፡

5. አድናቆትና የፍቅር ቃላት
የምናፈቅራትን ሴት ለማግኘት በሚኖረን ቅርርብ ውስጥ የፍቅር ቃላትን መጠቀም የግድ ነው፡፡ ምን አይነት የፍቅር ቃላትን በምን አይነት ጊዜ መጠቀም እንዳለብህ አስቀድመህ ባታውቅ እንኳን ስለ እሷ ስታስብ ለማወቅና እንዴትስ መጠቀም እንዳለብህ ራስህን ልታዘጋጅ ይገባሃል፡፡ ለምን ቢባል ሴቶች በተፈጥሯቸው በመደነቅ ውስጥ ያለን የፍቅር ቃላትን ይወዳሉ፡፡ የፍቅር ቃላትን ልትጠቀምባቸው ከምትችላቸው አጋጣሚዎች መካከል ቆንጆ እንደሆነች በመናገር መግለፅ ነው፡፡ የምታፈቅራትን ሴት እሷ አንተን እንደምትስብህ መስማት ትፈልጋለችና ስታገኛት ቆንጆ መሆኗን ንገራት፡፡ በተለይም የተለያዩ የሰውነት ክፍሎቿን ለምሳሌ ዓይንሽን፣ ፀጉርሽ፣ ጥርስሽ፣ ቆዳሽ የመሳሰሉትን ለይተህ እየጠቀስክ በጣም ያምራል/ሉ በላት፡፡ እንደዚሁም አለባበሷ፣ አረማመዷ፣ አመለካከቷ፣ የተቀባችው ሽቶ የመሳሰሉት ውበቷ እንዳሰመጠህና እሷን በማሰብም መብላት መጠጣትም እንዳልቻልክ ሹክ በላት፡፡ ታዲያ ስለ ቁንጅናዋ የነገርካትን ሁሌም ያለማቋረት መስማት ትፈልጋለች፡፡ ግንኙነታችሁን እንደጀመራችሁ ሰሞን ወይም እንድትደሰትና ከአንተ ጋር እንድትሆን ስትፈልግ ብቻ ከሆነ የምትነግራት የማድነቅህ ነገር ለዘላቂ መቀራረባችሁ ጥቅም አይኖረውም፡፡ ለምን ሁሌም ቢሆን ሴቶች ይህን የአድናቆት ሁኔታ መስማት ይፈልጋሉ፡፡ ምቾታቸውን ከሚያሳጣ ነገር የማውጣትና ወደ ምቾትና ደስታ የመክተት ኃይል አለውና እነሱን ማድነቅና ማሞካሸት የሁል ጊዜ ስራህ ይሁን፡፡ ከአድናቆት ጋር አያይዘህም ድንቅ የፍቅር ቃላትን እየተጠቀምክ ወደ ፍቅር ዝንባሌ ውስጥ እንድትገባ አድርጋት፡፡ ስትጨዋወቱም ‹‹አንቺን ስላወቁሽ ከልቤ ደስተኛ ነኝ፣ አንቺ በጣም ታውቂያለሽ፣ ሳይሽ በህይወቴ ውስጥ ትልቅ ነገር ማድረግ የምትችዪ ትመስይኛለሽ›› ስትላት አንተን ከመሰለ ወንድ መለየት እንደማትፈልግ ውስጧ ይደመድማል፡፡ ቀኗን ጠብቅላት እንጂ ነገሩን አፈንድታው ትነግርሃለች የበለጠ የፍቅር ሽሚያ ውስጥም ትከትሃለች፡፡ ሌላ የፍቅር በነስ ማለት ይሄ ነው፡፡
ታዲያ ይህን የፍቅር ቲፖች ጀባ ብትላት እሷም በፍቅር ቦነሶቿ ታስደስትሃለች፡፡ በፍቅር ሽሚያ ውስጥም ሰምጣችሁ ትዋኛላችሁ፣ መልካም ፍቅር!

 http://www.tenaadam.com/archives/1415